綠茶蛋糕

老公最鍾意就係坐喺電腦前面摷吓網上有咩平嘢賣。嗰日佢見到我夢寐以求嘅 KitchenAid Stand-mixer 竟然有半價!!!! 老公同我即刻揸車出去買! 好彩嚟早一步，去到嗰時有人一次過買咗兩部，我哋梗係唔執輸啦，我哋都買咗兩部。

噚日就同個 stand-mixer 開齋，整咗個綠茶蛋糕。記得上次個綠荼蛋糕失敗咗... 個蛋糕一啲都唔鬆軟。

有啲唔忿氣，一定要做個成功嘅!  唔知係咪個 mixer 關係, 個蛋糕做完出嚟好似真係靚仔啲！鬆軟啲！！ 今次成功啦！

有血有汗嘅蘿蔔糕

嗰日終於去咗三藩市唐人揾到傳聞嘅戊利, 買咗Ｄ臘腸, 臘鴨肶, 臘肉。 紙上談兵咁研究咗一段時間嘅蘿蔔糕終於可以落手落腳制做出嚟！

噚晚同老公去咗 Wallmart 買埋個刨, 平平地買咗個３蚊嘅, 見到其他有啲成十幾蚊, 我諗都係差唔多啫, 價錢洗唔洗差咁遠呀？！

點知一開始刨蘿蔔 ~~~~ 哎呀！ 揸唔緊舊蘿蔔, 滑手飛咗舊蘿蔔出嚟不特只, 又倒瀉碗瑤柱水, 最慘係刨到隻手指尾, 流咗好多血, 差啲仲以為要叫老公 call 救傷車！ 好彩到最後都止到血...

其實整蘿蔔糕都唔算難, 最煩係要刨蘿蔔, 其餘都唔算煩。好彩個蘿蔔糕整咗出嚟都幾好食, 係胡椒味重咗喲。下次會輕番啲手。 不過老公都話好味!  下次再整過先, 雖然今次出咗啲意外, 不過我係唔會俾佢嚇倒嘅，因為每個廚師都會經歷過呢啲意外！

曳曳嘅小白

小白小時候屋企有張皮梳化, 小白嚟咗以後張皮梳化好快已經被佢抓爛... 從始之後, 屋企只會用布梳化。
嚟咗美國, 屋企有張老公用咗好耐嘅皮梳化。小白見到梗係手仔痕，要抓梳化!!!!

咁嘅情況我梗係唔會縱容佢啦!!  一定鬧到佢狗血淋頭
  .\ /.

小白好似識聽咁, 被我鬧完之後頭dum dum, 企埋一邊好似罰企咁。 見佢咁可憐又忍唔住錫番佢囉！

我嘅小白 =^.^=

呢家等我介紹吓我個寶貝 - 小白! 名副其實佢真係好白, 我亞哥叫佢白檬檬。佢係一隻安哥拉貓 (Angola), 我由佢手掌咁大養到呢家十三歲啦!  仲由香港陪嫁到美國, 佢簡直係我生命嘅一部份!!

小白好可愛, 好得人鍾意。佢嘅性格就好似個小朋友咁, 有時好嗲, 有時好曳, 有時好似識聽你講嘢, 有時就越叫越走！！

我在美國的生活...

已經移民嚟到美國二個月,  生活倘算習慣。
每日過住優閒嘅日子, 學做蛋糕, 學做菜, 做家務, 睇吓書, 聽吓收音機, 等老公放工返屋企。呢Ｄ就係我每日嘅生活。初到矽谷, 人生路不熟, 又未有driving license, 感覺好似冇咗對腳咁, 超級唔方便。不過老公都擔心我冇嘢做會悶, 買咗好多整餅工具俾我, 其實我冇喺香港整過蛋糕, 但係我好有興趣玩吓烹飯仔, 整吓餅。 就係咁樣, 我就開始做我嘅小伙頭啦！
好好彩, 我好快已經考到車牌, 我嘅甲蟲車下星期就送到添！(好期待呀 ^^ ) 到時我就有毛有翼, 自由啦!!